هنشرح ازاي تشتري عربية من المانيا

هنشرح ازاي تشتري عربية من المانيا
او اوروبا وتنزلها مصر

علشان ناس كتيرة بتسألني ازاي نستفيد من الاتفاقية وتشتري عربية تقفيل ألماني يستاهل الفلوس اللي ادفعت فيها... وتبعد عن الفيلم الداير ما بين خليها تصدي و شركة المساهمة الجديدة بتاعت الجيش و التوكيلات الجشعة علشان اللي مش فاهم يفهم ويفهم غيره

مرحلة البحث:
معظم الناس حاليا في المانيا واوروبا بتستخدم المواقع بشكل كبير تتفرج وتسأل براحتها بدل ما ينزل ويلف ويعطل نفسه ويضيع وقته وبالتالي تدخل علي موقع وتختار

mobile
autoscout24

دا احسن موقعين لبيع السيارات في المانيا وأوروبا عموما سواء جديدة أو مستعمله

الموقعين دول للتجار و البائعين الأفراد والمعارض وليس المصانع... طيب ليه مافهوش مصانع.. لانك ببساطة مش هتقدر تشتري من الشركة الام أو المصنع إلا لو كنت عايش هنا ... لأن عندك في مصر ناس بالفعل واخدة توكيلات المصانع دي.. وبالتالي الجمارك مش هتسمحلك انك تدخل عربية انت مشتريها من المصنع لأنك بكده بتضر بمصلحة الوكيل اللي بيشغل ناس وبيدفع ضرائب في مصر ( زي فكرة franchising)

علشان كده لما تيجي تشتري من بره بتشتري من تاجر
أو معرض ..ويكون هو اشتراها من المصنع بالفعل للعرض
أو بيطلبهالك مخصوص وسواء كده أو كده بتبقي علي اسمك و انت بتكون اول مالك لها

2- دخلت ودورت كويس ولقيت العربية المناسبة ليك ولمزانيتك او عاوز تطلب العربية بمواصفات خاصة سواء داخلية أو خارجية و اتاكدت أن التاجر أو صاحب المعرض كويس وسمعته كويسه وشوفت ال review بتاعته وآراء وانطباعات الناس علي شغله

نقاط مهمة جدا:

لو هتشتري من ألمانيا اتاكد انك تلاقي تاجر في أو قريب من هامبورغ علشان الميناء ومتخليش العربية تمشي كتير علشان توصل للشحن(ونش السيارات غالي).. وهكذا بالنسبة للدول التانية قرب علي اد ما تقدر من المدن الساحلية اللي فيها موانئ.. ومعظم المدن دي بيبقى تجار السيارات فيها كتير جدا جدا

حاول علي اد ما تقدر تتعامل مع التجار الألمان لأنهم دغري ومعندهمش لف ولا دوران وابعد عن الروس والبولنديين والألبان... وفي تجار عرب واتراك كتير بس مش كلهم كويسين فخليك حذر و لو شكيت في أي حاجه أو حسيت أن في حد بيجبرك علي حاجه وبيقولك هو النظام كده وقف علي طول

مرحلة الشراء:

لو تعرف حد عايش في أي حته في اوروبا سواء بقي قريبك/ صحبك/ حد معرفة بيدرس أو بيشتغل بس يكون محترم وأمين.. تقدر تكلمه و تبعتله لينك العربية من علي الموقع وهو يبدأ يتواصل مع التاجر و لو قدر يروحله ويتفق معاه علي كل شيء يبقي افضل..ونفس الكلام بتبعتله صورة بطاقتك الشخصية أو الباسبور علشان يكتب العقد باسمك وتبقي اول مالك للعربية.

مرحلة الدفع:
في 3 طرق للدفع

1- الاعتماد المستندي: ودا عبارة عن اعتماد بنكي مرتبط ببوليصة الشحن وبيتم كالتالي بعد ما تتفق مع التاجر علي السعر النهائي بتاخد منه اسم البنك ورقم الحساب وال IBAN و ال SWIFT.. واسم الشركة بتاعته GmbH

لو العربية جاهزة وعنده بتخليه يبعتلك رقم الشاسيه كمان علشان تكتبه في اوراق الاعتماد وبتروح البنك بتاعك وتقولهم انك عاوز تعمل اعتماد مستندي خاص بالعربية دي و برقم الشاسيه ده وبتودع الفلوس أو بيسحبوها من حسابك

البنك بيفتح الاعتماد بعد ما بيتواصل مع بنك التاجر هنا في ألمانيا والفلوس ما بتتحولش للتاجر غير لما يشحن العربية علي المركب ويجيب للبنك بوليصة الشحن

خد بالك أن البنكين(المصري & ألماني) بيخدوا عمولة ممكن توصل 15% علي المبلغ كاملا

2- لو تعرف التاجر أو واثق فيه تقدر تحوله الفلوس بشكل مباشر علي حساب شركته GmbH فالبنك وفي ال reference بتاع الحوالة بتكتب أن الفلوس دي خاصة بشراء العربية نوع كذا، موديل كذا و رقم شاسيه كذا علشان لو حصل حاجه غلط تعرف تاخد فلوسك

هقول فالاخر إزاي تتصرف لو حصل أي مشكلة

3- انك تحول ثمن العربية ومصاريفها (نقل وشحن) للوسيط اللي هنا وبتخليه هو يشوف العربية ويكتب العقد بإسمك و يستلم العربية ويبدأ إجراءات الشحن وبرده نفس الكلام لما تيجي تحوله الفلوس تكتب فال reference بتاع الحوالة أن الفلوس دي خاصة بشراء العربية (مهم جدا) وتخليه يبعتلك صورة إقامته وعنوانه بحجة أن محدش ضامن الحياة من الموت

مجرد ما بيشحن العربية بيبعتلك الأوراق الأصلية كلها ب DHL من العقد لفاتورة البيع و الضمان و بوليصة الشحن وكل حاجه

مرحلة الشحن:
في 3 انواع للشحن

1- شحن عادي علي سطح المركب ودا بيتكلف حوالي 600 يورو.. بس مش مضمون لأن ممكن تتسرق من العربية أي حاجه او مثلا تتخبط أو تتخربش
سواء التاجر هو اللي بيشحن ومحدش هيقدر يعملك حاجه لأنك مش هتقدر تثبت انه حصل علي سطح المركب

2- شحن VIP ودا شحن زي مابيقولوا شحن كابينة وبيبقي عليه تأمين محترم ضد أي نوع من انواع الحوادث سواء سرقة أي حاجه من العربية أو اتخبطت اثناء شحنها علي المركب أو تفرغها ودا بيتكلف حدود ال 1000 يورو... وتعويض التأمين بيبقى حاجه محترمة ولو حتي كان خربوش صغير

3- شحن كونتينر ودا شحن عن طريق بيحطوا العربية جوه حاوية وبيشحنوها ودا تكلفته ما بين 1000 الي 1500 يورو

طبعا التكلفة بتختلف من دولة ل دولة ومن ميناء ل ميناء تانية يعني تكلفة الشحن من إيطاليا مش هتبقى زي تكلفة الشحن من ألمانيا. .بالإضافة إلي مدة التوصيل اكيد برده بتختلف

في معلومة لازم تسأل فيها التاجر وتعرف كويس ميعاد وصول المركب للميناء الي هتستلم منها ..وعموما من ألمانيا في مركب بتخرج من هامبورغ كل 15 يوم وبتوصل في خلال 15 يوم اسكندرية

مرحلة الجمارك:

طيب علشان نكون واضحين الحكومة المصرية مش حكومة ساذجة علشان توافق علي الاتفاقية دي من البداية لو هي عارفة أنها هتخسر...لأن بند الجمارك بند له ثقله فالميزانية العامة للدولة ومافهوش تهريج والدولة معتمدة عليه بشكل كبير جدا... وبالتالي انت لازم تبقي عارف ان الخسارة من البداية هتبقى علي الوكيل... يعني الدولة هتاخد حقها من أي عربية هتدخل البلد غصب عن أي حد

طيب ايه المصلحة اللي ممكن نستفيد منها انك هتوفر ما بين 100 الي 200 الف جنيه من ثمن العربية لو اشترتها بنفسك من بره.. اللي هما كانوا مكسب الوكيل ومعارض التجزئة والعمولات. .إلخ

بالإضافة إلي أن التقفيل الألمانى أو الاوروبي بشكل عام بيختلف عن التقفيل الخاص بالسيارات اللي بتصنع خصيصا للشرق الاوسط زيها زي الموبايلات

يعني العربية المنتجة للسوق الالمانى احسن كتير من العربية المنتجة للسوق المصري علشان معايير وضوابط التصنيع و السلامة في المانيا أعلي من من معايير وضوابط مصر بمراحل

يعني ال 40% جمارك اللي كانوا بيدفعوا زمان ... مابقوش صفر% جمارك ولا حاجه ...هما خلينا نقول هيبقوا مابين 25 الي 30% مابين ضريبة القيمة المضافة وسعر دولار جمركي ومستخلصات و مخصصات و رشاوي و مستنقعات والخ وانت وشطارة المخلص الجمركي اللي معاك

وبتدفع جمارك العربية يا أما مقدما في جمرك المطار فالقاهرة أو تسددها بنفسك لما تروح تستلم العربية في اسكندرية(لو شحن مركب أو vip) أو بورسعيد ( لو شحن كونتينر)

مرحلة الوصول واستلام العربية:

العربية وصلت الحمد لله بتبدا تشوف مخلص جمركي علشان يخش يخلصلك الأوراق... ودي حاجه أي مخلص يقدر يعملها بسهولة ..وبالنسبة لعرقه دي بقي انت واتفاقك معاه

طيب لو التاجر أو الوسيط اللي انت بعتله الفلوس علشان يشتري العربية اخد الفلوس وماردش عليك أو حسيت أن في أي تلاعب... بكل بساطة هتشوف محامي هنا في المانيا يكون من نفس مدينة التاجر ( اكتب علي جوجل Rechtsanwalt + اسم المدينة) وتبعتله ايميل أو تكلمه فالتليفون وتشرحله الموضوع وتبعتله صور من الأوراق والمحادثات اللي تمت مابينكم وصور التحويلات المالية( علشان كده قولت فوق لازم تكتب في ال reference بتاع الحوالة أن سبب التحويل هو لشراء سيارة وطبعا تكتبه بالإنجليزي ويكون معاك عنوانه أو صورة إقامته) اللي عملتها للتاجر او للشخص اللي انت وسطه للشراء... اللي هيحصل أن المحامي هيبدا يبعت للتاجر/ الوسيط خطابات انذار لرد الفلوس أو لاتمام عملية الشراء وشحن السيارة وفي معظم الحالات التاجر او الوسيط بيخاف وبيجيب ورا طالما دخل فالموضوع محامي وبيخلص الموضوع بسرعة علشان هو عارف انه لو وصل للمحكمة هيدفع فلوسك اكتر بكتير من اللي هياخدها منك بالاضافة لمصاريف المحامي بتاعك وكمان مصاريف المحكمة وتكلفة المحامين والمحاكم هنا غالية جدا وكمان ممكن تاخد تعويض.. يعني هيتخرب بيته... وكمان تعمله Bad review علي الموقع ..ودا في حد ذاته تدمير له ولسمعته. . لأن هنا ثقافة ال review وانطباعات الناس مهمة جدا وبتاثر علي علي المبيعات بشكل كبير

حبيت بس اوضح الصورة علشان تبقي عارف الدايرة بتدور وبتمشي ازاي وماتخليش حد يضحك عليك أو يشتغلك... لأن فالاخر انت واهل بيتك أولي بأي قرش هتوفره فالظروف اللي البلد بتمر بيها وفي نفس الوقت تتبسط وانت راكب عربية محترمة تستاهل الفلوس اللي دفعتها فيها... ومتخليش حد يستغلك ويعمل عليك فلوس من الهواء......
الاستيراد بيكون لموديل السنه فقط
ولو مستعمل بيكون الاستيراد للمعاقين فقط

شير لكل الناس تستفيد #منقول_للافاده
تعديل ١ : ي جماعه مش انا الى كاتب البوست انا لاقيته ف جروب والشير مقفول فاخدته كوبى ونزلته هنا للافاده بس مش اكتر ، لو حد حابب يوجه شكر فالشكر واجب لكاتب البوست الاساسى الى انا معرفهوش اصلا ، فندعيله دعوه حلوه ع المعلومه الجميله دى